大麻二酚口服油 || CBD Oil

• 

頭盔：
● 本文純屬長期失眠患者使用大麻二酚口服油的心得分享，閱畢全文並有興趣嘗試者請先諮詢醫生意見。
● 每人體質均有個體差異，對藥物承受和容忍程度也不同，對我有效不代表一定對你有效，反之亦然，對我無效的可能對你有效。

簡單 Q&A （給不想看長文的你）➜

係咪即係大麻？
係，正如你飲火麻仁，廣義上都係大麻嚟。

合法嗎？
我使用的大麻二酚口服油在港合法。

失眠情況有改善嗎？
有。

有冇出現副作用？
少少，會突然超級口乾（但我已經係日飲超過兩公升水的人）。

會上癮嗎？
世衛有研究報告話用 CBD 唔會成癮（問我個人感想就要等我食晒成支再戒一排先答到你）。

正文開始➜

廣義的大麻包括：
（1）工業大麻
（2）食用大麻
（3）醫用大麻
（4）娛樂大麻

工業大麻又叫火麻／漢麻，大家日常見慣見熟的麻布、麻繩，麻包袋就係來自（1）；火麻油、火麻仁、大麻籽係（2）；本文介紹的大麻二酚口服油（CBD Oil）係（3）；一般而言會被稱為毒品的大麻就係（4）


大家都係大麻，使唔使分得咁仔細？
確實係要分清楚，因為大麻入面含有至少 144 種大麻素，而每種大麻素對人體的作用都有些少分別。
不過本文只會講述大家最需要知道的兩種：四氫大麻酚（Tetrahydrocannabinol，簡稱 THC）和大麻二酚（Cannabidiol，簡稱 CBD）。


THC V.S. CBD
（4）娛樂大麻中令用家吸完會 High 的關鍵是 THC ，THC 係大麻主要的精神活性物質，會通過人體中的大麻醇類神經系統 CB1 受體以及 CB2 受體發揮作用。

（1）工業大麻係指 THC 含量為 0 或少於 0.3% 的品種，（2）食用大麻不含有 THC 同 CBD，因為呢兩種大麻素都只存在於花葉，而不存在於種子。

（3）醫用大麻會擁有較高 CBD ，因為 CBD 不具精神活性，食完唔會 High 之餘，仲有多種藥理作用，包括但不限於消炎止痛、放鬆神經和治療濕疹。

由於 CBD 在香港唔屬於《危險藥物條例》下的受管制藥物，所以只要賣家遵守《藥劑業及毒藥條例》（第 138 章）規定，向藥劑業及毒藥管理局註冊，就可以出售或分發產品（生產商、進口商及分銷商亦須申領相關牌照）。總之，只要賣家守法，你在香港買到的純 CBD 產品就係合法。按我了解更多


豆知識：
● 荷蘭定義為合法的是醫用大麻，娛樂用大麻其實都係唔合法架，只是持有不超過 5 克除罪化，同埋要在大麻咖啡店吸食。
● 加拿大同烏拉圭先係醫用大麻、娛樂用大麻，以及個人種植大麻三件事都合法的奇蹟之地。按我了解更多


點解 CBD 會興起？
應該係因為近年某啲地方對娛樂大麻同藥用大麻的管制逐步放寬，有利潤＝有生意＝普及化，所以就 Hit 咗。香港都多咗好多店舖引入 CBD ，除咗直接賣口服油同外用藥膏，有啲仲會將 CBD 加入咖啡、果汁或食物，加上寵物都可以用，簡直係商機無限。按我了解更多

★ 留意返，CBD 同 THC 一樣都係脂溶性，理想媒介係脂肪（例如溝入椰子油、牛油餅乾、朱古力），要食啱方法先會最易吸收。


使用心得
● 選擇 CBD Oil 的原因

（1）失眠嚴重
最近嚴重起來只睡到兩小時，睡前肌肉抽動也很頻繁。長期失眠的人都會明啦，有時過了臨界點＝調整不回來＝陷入愈累愈睡不好，愈睡不好愈累的惡性循環。

（2）我討厭看醫生和食藥丸
所以先揀咗隻用椰子油做底的產品，完全無怪味＋滴脷底等一分鐘就得，非常好！！如果是用火麻油做底就不了。

（3）睇完資料覺得副作用在自己能夠接受的範圍內
我而家冇服用其他藥物，同 CBD Oil 冇衝突，加上食咗都唔一定會出現副作用。況且，就算真係出現口乾、腹瀉同肌肉疲勞，在我而言都比長期服用 Z-drug／抗組織胺的副作用輕微。

★ 重要的事講多次，如果你正在服用其他藥物，或者肝有問題，請先諮詢醫生意見！！！CBD 係少副作用，唔係完全冇副作用。

（4）要是能順道改善埋濕疹同抑鬱就是 Bonus
睇完用家返圖就知，外用的 CBD 產品真係濕疹救星！！
抗抑鬱抗焦慮就真的當 Bonus 吧，如果你抑鬱很嚴重，我諗做 CBT 可能更有效。

● 服用劑量
雖然有報告指人體對 CBD 耐受程度好高，連續四星期每日食 1500 mg 都冇事，但我梗係好乖地由低劑量開始。不過，由於改善失眠本身就需要用較高強度的劑量先會見效，我第一劑就食咗 20 mg（呢個都係賣家的建議初始用量），之後我用自己體重計返，如無意外一日食 60 – 65 mg 都係保險劑量，所以就變成每日食 40 mg。

● 劑量計法
睇返專家建議，每日的建議用量可用體重去計，每 10 磅用 1 – 6 mg ，如果你體重係 100 磅，每日就可用 10 – 60 mg。按我了解更多

● 效果
第二日用完 40 mg 已經瞓得返六小時，雖然仲係好斷續咁瞓（2+2+2），但起碼瞓得著。後續請等我食完呢 1650 mg 再補充。（好在揀咗 1650 mg，如果係買 400 mg，食十日就食完＋每次要食 2 ml = 滿滿兩管咁多）